داینا    

مجید یالقیزکؤچدو! ادبییاتین اوره یینه یئنه چارپاز بیر یارا وورولدو!

رضا عالی

 بئله خیال ائله مه گؤرمه سم اوزاقلاشارام

سنین خیالین ایله هرگئجه قوجاقلاشارام             مجيد يالقيز

 اؤلوم سئوينمه سين غلبه سينه

صنعتكار اؤلسه ده ياشاياجاقدير

بو دونيا هئچ كسه ده ييل ابدي

دونيادا وار اولان صنعت دير آنجاق

 نريمان حسن زاده

حیاتین آجی شیرین لیگی اینسانلارین یاشام گئدیشاتیندا بیر سیرا تاثیرلر بیراخدیقدا، گاهدان اونلارین گؤز یاشلارینین آخماسینا، گاهدان ایسه گولوش شلاله لرینین آشیب داشماسینا سبب اولور. سون گونلرده ادبییات دونیامیزدان یئنه بیر اولدوز آخدی. بو اولدوزون آرامیزدان کؤچمه سینه «آخیش» صیفه تینی وئرمک بلکه ده اونون حاققیندا بیر آز اینصاف سیزلیق اولموش اولا. داها دوغروسو دئسم کی ادبییاتین اوره یینه چارپاز بیر یارا ویریلدی، هئچده یئرسز اولمایاجاق. بو آجی خبر لری عادت اولاراق هر ایل ائشیدیریک. سانکی طبیعت بونا عادت ائله ییب هر ایل بیر ایکی ضیالینی  الیمیزده ن آلمایاندا دئیه سن راحاتچیلیغی گلمه ییر. هر حالدا بو ایل ده یالقیز *عمی   نی الده ن وئردیک. یالقیزین حیاتی آغریلارلا دولو اولسادا، دوداغیندان، شعرلرینده ن گولوش هئچ زامان ایتمه میشدی.دئمیره م آغریلاری نه ده ن ایدی! اونون حاققیندا دانیشماق قالسین گلن یازیلارا، تکجه دئمک اولار کی گؤز ایشیغی اولان، آرزیلارینین تمثیلچی سی اولان تکجه بالاسینی « اوز گؤزو توزلو قویلایان» یالقیزین دردلری بو آغریلارین بیر بؤلومو ایدی.       

بوگون آذربایجانین خیصوصیله تبریزین طنز ادبییاتیندا ایتی، کینایه لی، پاکاتلی، عین حالدا دوداقلارا گولوش قوندوران، بیلنلری فیکره دالدیران، بیلمه ینلرین آغیزلارینی قولاقلارینین دیبینه قده ر آچدیران سؤزلرین یازیچیسی یالقیز عمی داها بو گون آرامیزدا یوخدور و اونو تانییانلار، اونون شعرلرین اوخویوب،   گوله ـ گوله دیللرینین آلتیندا داداجاقلار بوآجیلیغی.

83 اونجو ایلین یای آیلارینین بیرینده یولوم «تبریزده تربیت کوچه سینین اوزبه اوزونده یئرله شن له له بَی» کوچه سینده «عصر آزادی» درگی سینین دفترینه دوشدو. او گونو دفترده اوتورانلار، درگی نین تورک صحیفه لرینی ایداره ائده نلر ایدیلر. او گونلرده بو صحیفه نین آدینی «ایکی کلک» قویموشدولار. بو ایکی کلک لر ده ن بیری رحمتلیک مجید آغا یالقیز، باشقاسی ایسه طنز شاعیریمیز« شهرک لی میرزه» ایدی. اونلاری بیر یئره ییغان ده یرلی عالیم ژورنالیست «عباد احمد زاده» اولموشدور. او گونه قده ر من رحمتلیک یالقیز ایله یاخیندان تانیشلیغیم یوخودو، تکجه اونون شعرلرینده ن بیر نئچه سینی اوخویوب اونون طنز شاعیری اولماسینی بیلیردیم.

آنجاق او گونده ن حؤرمتلی اوستادیم عباد احمدزاده نین دعوتی ایله منده «ایکی کلک» صحیفه لرینه قوشولدوم. البتته سونرالار آنادان امدیگیم سود، درگی نین مودورلرینین حیما یه سی ایله «اـ ه» کیمی لر طرفینده ن بورنومدان گلدی ایسه یئنه او گونلر منیم اوچون ان شیرین گونلرده ن بیری ساییلیر.

او نئچه ایلده نه ایشلر بو صحیفه لرده گؤردوک؟ نئجه گؤردوک؟ اؤزونه مخصوص حیکایه لری واردیر کی قالسین سونراکی یازیلارا. دئمه لی بوکی او گونلرین خاطیره لری رحمتلیک شهریار دئمیشکن:«بیر سینما پرده سی دیر گؤزومده»!

بیر نئچه آی کئچدیکده ن سونرا صحیفه لرین آدی ده ییشیلیب،«اوجاق» آدی ایله ایشینه داوام وئردی.

بو صحیفه لرده یوزده ن آرتیق دانیشیق، یوزلر شعر، چئویرمه، کؤچورمه و بو کیمی مطلب لر یازیلدی بو صحیفه لرده.

هئچ ده یادیمدان چیخماز، گونلرین بیرینده یالقیز عمی، قارین چوخ یاغماسیندان، قیشین اوزون سورمه سینده ن گیلئیله نه ره ک اوزونو منه توتوب: آی ریضا بو قیش نه زامان قمیشین چکه جک گؤه سن دئیه پنجره ده ن ائشییه باخدی.

سونرا، قاییدیب اوتاغین اورتاسیندا دوزولن صندل لرین بیرینین اوستونده  اوتوروب، هرزامانا تای اوزونده گولوش، داریخمایین آللاه کریم دی دئیه اللرینی بیغلارینا چکیب، سونرا الینی جیبینه ساری آپاریب، سانکی جیبینده ن بیر زاد چیخارماق ایسته ییر دئیه گؤزلویونو بیر جیبینده ن، باشقا جیبینده ن ایسه سویوق قیش و  پاییز حاققیندا یازیلان شعری چیخاریب بیزه اوخودو. ائشیکده کی سویوق ـ قار هله ده لجاجتله داوام ائتمکده ایدی.

بو ایشده ن بیر ایل کئچدی اولدو 84 اونجو ایلین پاییزی.  دفترین یئری ده ییشیلمیشدی.دئدیگیم کیمی منیم بو آرادا درگی ایله امکداشلیغیما بیر آز آرا دوشدو.  صونرالاریئنه ایشیم یئنی ده ن باشلادیم. گونلرین بیرینده یالقیز عمی ایله یئنی دفترین موتورخاناسینین پئنجره سینین قاباغیندا پاپیریز چکه ـ چکه خارابا بیر دامین حیطینه باخا ـ باخا دانیشیردیق. یالقیز عمی یه اوستاد مومکون اولسا او پاییز شعرینی بیر داها منه اوخویاسیز دئیه اوزومو اونا ساری توتدوم.

یالقیز عمی هئچ زامان اوندان شعر ایسته ینده یوخ دئمزدی: هه ریضا بالا یاخشی دئدین. لاپ یئری دیر دئیه شعرینی اوخوماغا باشلادی. سسینده کی حوزن، شعرینده کی غم ـ کدر گؤزلریمی دولدوردو. منیم بو حالیمی گؤره ن یالقیز، شعرینی اوخویا ـ اوخویا باشلادی منله بیر گه آغلاماغا: ریضا یامان داریخیرام. بیلمیرسن نئجه بو حیات منی سیخیر! داها لاپ آجیغیم گلیر بو یاشاییشدان.

او گونو یالقیز عمی نین نه ده ن  بئله سیخیلماسینین سبب لری حاقدا سونرالار اونونلا دانیشدیقسا، نه اوچون اولدوغونو منه آچیقلادی. آما سؤز اوزانماسین دئیه اوندان واز کئچیره م.

آنجاق یالقیز عمی نین او گونو هؤنکور ـ هؤنکور آغلاماسینین سسی هله ده کی وار قولاغیمدادیر. یالقیزین اوره یینده داغدان آغیر دردلر وارایدی. اوجاق صحیفه لرینین گئتمه سی بو دردلر اؤنونده اونا توخداقلیق وئریب اوره یینه تسللی وئریردی. آما سونرالار«اوجاق » صحیفه سینین تعطیل اولماسی اونو داها آرتیق داریخدیریب، فیکیرلرین اونا هیجوم گتیرمه سینه ایمکان یاراتدی. آخی بو صحیفه لر گئدیرکن مسعود شریعتی کیمی، ذوالفقار کمالی، محمدرضا شوکتی، رضا ایتگین و...بو کیمی دوستلارـ تانیشلار یالقیزین باشینا ییغیشیب اونون فیکیرلرینی داغیدارکن اوره ک یارالارینا مرحم اولوردولار.یالقیز عمی ده بو صحیفه لرده هئچ اولماسا اوره ک دردلرینی ائشییه تؤکوب، بیر آز یونگولله شیردی آما حاییف کی ...

رحمتلیک مجید آغا یالقیز تکجه او بیر نئچه ایلی ادبی بیر کیمسه کیمی ادبی یاشاماق دادینی دادا بیلدی. منجه او نئچه ایلی بو ایکی صحیفه عشقی، اونو هرگون  تئزده ن ایش یئرینه گتیر یردی. اونو اؤز اوشاغی کیمی باغرینا باسیردی و نهایتده اؤز بالاسی کیمی بو صحیفه لرله بیرگه تعطیل اولان گونده ن اوز گؤزو توزلو مزارا قویولدو. روحو شاد مزاری نورلا دولسون...  

*عمي  سؤزو بير ظرفات كيمي آراميزدا ايشله نردي