کیم کیمه دیل اَییر...
کئچن رئژیمین دؤورونده بیزده بیر چوخلاری خالقینین یولوندا تورمه لر ده قالیب اؤز دوشونجه لری یولوندا چتینلیک لره قاتلاشدیلار.بوگون اونلارین حیاتی حاقدا لازیملی تدقیقاتلار آپاریلماسی لازیمدی. اونلارین عائیله لری چکدیکلری چتینلیکلر قلمه آلینمالی دیر. منجه اونلارین دئمه یه چوخلو سؤزلری وار...
ایبراهیم برزگر- زندان قصر ۱۳۴۵
بو یازی ایتحاف اولورنور،بوتون دؤورلرده ناحاقجاسینا تورمه یهدوشن
اینسانلارا.
کـیم، کیــمه دیـل اَیـیـر!؟
گرگرلی آراز
ائله بیزیم کوچه ده بیر نفرایدی، اودا منیم نه نه م(آتا نه نه م)یدی.
اوست مچیتدن توتوب، آشاغی مچیده جان بو اوچ- دؤرد
محلله منیم آنامین قئیچیسینه باخیردی. هئچ بیر پول آلمادان
چادیرالیغی، دونلوغو، تومانلیق، یادا شلته- تومان اولسون، هامیسین
آخشام اوستو بیر یاریم ساهاتدا بیچیب، کنارا قویاردی.
همیشه ده بیر چادیرانی بیچنده، دؤور- برلری برک گولنده نه نه م
اختر خالایا قارقیش ائدردی؛ چونکو او ایلک دفعه نه نه مین چادیرا
بیچه-بیچه دیلین چیخارتماسین لاغا قویوب گولموشدو. نه نه م بیر چادیرانی
بیچنده، قئیچی تزه چادیرانین اوستونده گئده -گئده ، نه نه مین ده دوداغی
اَیریلردی. دیل آغزیندان ائشیییه چیخاردی. نه قدر قئیچی گئتدیکجه،
دوداق اَیریلیب، دیل چوخ ائشیکده گؤرسه نردی. بو واخت بیزده گولوب
دیل خوشلوغوموز حددن آرتییق اولاردی. آما بونودا دئییم ها، نه قدر بیز
گولردیک؛ او قدر نه نه م کیریخیب، بعضا حتتا تزه پارچانیدا چؤللردی.
منیم نه نه مین دوداق اَیمه سی، دیل ائشییه چیخارتماسی، بیلمه یه-
بیلمه یه ایدی! آما بعضی آداملارینکی بیله- بیله دی! شیرین خانیم
همیشه دانیشاندا، چونکو اَری مهندیس دی! دانیشاندادا، یئکه- یئکه
دانیشار! قئینی آروادی پوسته خانیم دؤوره ده کی آروادلارا باخیب، دوداغین
اَیر!بعضی واخت حتتا دیلینده ائشییه چیخاردار. یا گؤرموشم نیسه به ییم،
قیزی سکانی ووراندا قاییدیب دئیینه- دئیینه گئدنده، سکان دوداغین اَییب،
دیلین ائشییه چیخاردار! آما او گونلری گؤردوم فیضضه نین قیزی فاطما،
شهرلرین بیرینه اَره گئدیب؛ بیر زاماندان سونرا کنده قاییتمیشدی،
سو گتیرمک اوچون چئشمه یه گئتمیشدی، اوردا کوزه نی دولدورا-
دولدورا دانیشیب، دوداقلارین اَییب، دیلین ائشییه چیخاردیردی!
گئدندن سونرا اورداکی قیزلاردا اونو یانسیلایاندا دوداقلارین اَییب،
دیللرین ائشییه چیخاردیردیلار.
بونون ایشکالی یوخدور، نه اولار، آدام بیر چادیرا بیچنده یادا قئیین آروادی
بیر سؤز دانیشاندا، یادا بیر آدامی یانسیلایاندا دوداغین اَییب، دیلین ائشییه
چیخارداسان! او گونلری گؤردوم، قونشو کندیمیزده قدرتین اوغلو آیت
تورمه یه دوشوب؛ چئشمه باشیندا سکینه دوداقلارین اَیه اَیه، دیلین
چیخاردا-چیخاردا اونو تعریفله ییب، لاغا قویموشدو! بیردن بیر سؤز یادیما
دوشدو:چوخ - چوخداندان اوشاغیدیم، آنام ایله چئشمه یه گئتمیشدیم، آتام
تزه تورمه یه دوشموشدو، سکینه نین آناسی فاطما آتامین داستانین
تعریفله ییردی، هردنده دوداغین اَییب، بوزوب، دیلین گولماق اوچون ائشییه
چیخاردیردی! اوزاماندان قیرخ ایل سوغوشور، گئچن رئژیمین پیس ایشلرییادیمدان چیخیب،آما فاطمانین او عملی یادیمدان چیخماییب!
آما سؤز اوردادی کی چوخ آداملار ائله فاطما ، و قیزی سکینه تکین
آداملار،اؤز دوداق اَییب، دیل چیخارتمالارینین چؤره یین ،اؤز یاشاییش
زامانلاریندا یئییرلر.
داينا