اولار آغا اولار! 

 

دونن لریمه فرمان عمینین توکانیندا باش سینیردی، او اوشاق گئدیردی بو اوشاق گلیردی.

توکانا چاتاندا فرمان عمی من گؤردوکده های کوی سالدی: آی مهندیس بوینون سینماسین به هارداسان؟

ائله بئله هویوخدوغوم حالدا : فرمان عمی یئنه نه اویون چیخاردیبسان بئله؟

 فرمان عمی اوشاقلارین بیرینین پئیسه رینه سالا ـ سال: گئت گؤروم سنینکی آزدیر، سونراسی اوزون منه چئویریب : مهندیس باشلاما، گؤرموسن پیرتلاشیغام؟ اَللریوی قدیمین خانلاری کیمی  نه یه  قویوبسان جیبیوه؟ ایندی من اولسئیدیم باشیمی قازیردین.

بو سؤزمنه یامان ده یمیشدی:آی عمی ـ آی عمی ، سنی نه دئییم اولاسان. رحمتلیگین اوغلو خاطا قان ائله دیک یئنه گلدیک توکانیوا؟ اویونبازلیغی سن چیخارت، اونون آلتین بیز چکک!! بو نه ایش دیر؟ بو نه اویون دورچیخاردیبسان؟ بو اوشاقلاری نه یه تؤکوبسن بورا؟نه  اویون چیخاردیرسان؟

فرمان عمی نین سینیرلاری دئیه سن یاواش ـ یاواش پوزولوردو کیمی گلیردی نظره:

مهندیس عصابلاریمی قاتماها کئچل باشیندان بیر قاپباز ووررام آللاهو دانارسان.

الیمی چکدیم باشیما: عمی سن آللاه بیر دئه گؤروم نه اولوب؟

فرمان کیشی نین کرنزلیگینه دوشموشدو: مهندیس هله بیر ال یئتیر بو اوشاقلاری یولا سالیم دئییم نه اولوب.

چاره سیز لیکده ن اللریمی جیبیمده ن چیخاردیب: یاخشی دئه گؤره ک نئینه مه لییم؟

حیرص ایلن: سنی یئره باتاسان، بیلمیره م سنه بو مهندیس لیی کیم وئریب با...گلن اوشاغین اللرینده کی کاغیذی آلیب نایلون دا بیر آز پخله وئراونا.

بیر ایکی ساعات بئله لیکله کئچدی. اوشاقلارین یاواش ـ یاواش آیاغی کسیلیردی.باشیمیز آییلمیشدی. فرمان عمی ده ن:یاخشی ایندی دئه گؤره ک بو نه ایش دی؟ بو کاغیذلاری نئینه یه جک سن؟

فرمان کیشی دسمال الینده میزلرین اوستونه دسمال چکه ـ چکه :هه ... و امّا میقیلی خان...

بیلمیره م بیلیرسن یا یوخ؟ مکتبلی لر ایداره سی طرفینده ن دئییبلر اوشاقلار تاز­ا­رئیسه اؤز دوشونجه لرین یازسینلار:ایندی حئسابلا بو شهر ده نئچه مکتبه گئده ن اوشاق اولار؟ من اولارا دئمیشم اینشالاریزی یازین گتیرین من اؤزوم اولاری ییغیب گؤتوروب آپاراجاغام تازا رئییسین یانینا. بوردا ایکی خئییر وار، بیری بو کی هامی منی، هابئله توکانیمی  تانییار، ایکینجیسی بوکی رئیس منی تانییار، هله بونودا دئییم ایندیکی اوستاندار زاد سئچیلمه ییب بلکه منی اوستانداردان(والی) زاتدان ائله دیلر.آخی مهندیس دوزون آختارسان 4 آی دیر بو یئکه لیکده اوستانین اوستانداری(والیسی) یوخدونه بیلیسن او دئمیشدی ایندیکی کیم کیمه دی منده پرایدام کیمه نه سؤزونه تای بلکه گؤردون رئییسین منده ن خوشو گلدی گؤتوردو منی والی ائله دی، اؤز آرامیزدی ایندی ده باش قاریشیب کیم گله جک منی قورتدالایاجاق.آیری خئیری ده وار، لاپ توتاق رئیس منی تحویل آلمادی، اوشاقلاردان قالان کاغیذلاری آلیب بیر یئره ییغیب کاغیذین بو باهالیغیندا آپارارم ساتارام کاغیذچی لارا. من سالدیم چیخدیم بو ایشین باشا ـ باشی منه خئییردی.هر اوزونه دؤننده ن سونرا بو ایشین ایکی باشیدا منه خئییردی.

الیم آغزیمدا قالمیشدیم بو کیشینین بئینینین ایشله مه سینه فیکیرله شیردیم..واللاه هیتلر بیر بئله بیلسئیدی ها ایکینجی دونیا موحاریبه سینده اودوزمازدی.  

یاخشی فرمان عمی باشین آییلدی، ایشین زادین اولماسا من گئدیم. فرمان عمی ده ن آیریلدیم. یولا دوشدوم یولدا اؤز ـ اؤزومه فیکیرله شه ـ فیکیرله شه دئییردیم: اولار آغا اولار...