داینا    

_{بؤیوک سیککه شیناس}

_{سید جمال ترابی طبا طبایی رحمته گئتدی...}

_{مهر آیی نین ۲۱ اینجی گونونده آذربایجانیمیزین ده یرلی اوستادی حؤرمتلی سید جمال ترابی طبا طبایی رحمته گئتدی.}

_{یادیما گلیر منیم شمس تبریزی درگی سینده چالیشدیغیم ایللرده فرانسادان گلن بیر آرخولوگ درگی نین دفترینده: فرانسادا اوستادلاریمیزدان بیرینه سیککه شیناسلیق حاقدا معلومات ایسته دیگیمده باشینی توولاییب منه سیزین اؤز اؤلکه نیزده سید جمال ترابی آدلی بیریسی اولا- اولا، سیز منده ن نه اوچون بو حاقدا سوروشورسونوز؟ دئدی.}

_{او زامانلار من بو ده یرلی کیشینین نه قده ر بؤیوک بیر اینسان اولدوغونو دوشوندوم.}

_{آنجاق بو گون اونون تورپاغا باسدیریلما مجلیسینده کیملرین نه دانیشدیغینا هویوخدوم.}

_{ایکی ایل بوندان اووه ل تبریزین بین الخالق کیتاب سرگی سینده بو رحمتلیک اوستاد ویلچر اوستونده گلیب  صحنه یه چیخدیقدا، تبریزیمیزین کئچمیشینده ن دانیشدیقدان سونرا اوزونو ایرشاد ایداره سینین مودورونه توتوب: رئییس آغا منیم اؤز خرجیمله چاپ ائتدیردیگیم کیتابلار هله تاخچادا توز باسماق حالیندادیر دئیه اوزونو رئییس آغایا توتدو. رئییس آغا ایسه : اولسون آللاه قویسا اونلارین هامیسینی بیز گؤتوره ریک دئیه گولومسه دی.}

_{سونرالار من بو مسئله نین آردینی توتدوم آما دئیه سن رئییس آغانین یادیندان چیخمیشدی بو سؤزو دئییب دیر.}

_{آنجاق کاش بو گون اونون مجلیسینده دانیشیلان سؤزلر باری یاددان چیخماسین. بو گون چوخ کیچیک آداملار بیر بؤیوک آدامین یاس مجلیسینده یئکه سؤزلر دانیشدیلار . اینانیران بو آداملار سؤزلرینه عمل ائده بیلسینلر. اینشاللاه ....}