سازاینسانلار یاشاییشینا  ایلاهی ده ن وئریلن پای دیر.

 

آشیق عوض عباد پورلا دانیشیق

دانیشیغی آپاران: رضا عالی

آشیقلیق صنعتینده ن دانیشاندا تکجه آشیقلار الینده چالینان ساز یوخ، بلکه بوتون اونون چئوره سینده کی وارلیقلاردان سؤز گئدیر.

بوگونکو دورومونو نظرده آلماساق، آشیقلیق صنعتی ائل آراسیندا هر زامان ده رین حؤرمته مالیک اولوب. هر زامان آشیق آدی گلنده اونون شرفینه هامیلار آیاغا قالخیب حؤرمتینه مجلیسلرده هامی دیز اوستده اوتوروب سس سیزجه ده ن چالینان هاوالاری دینله میشلر.البتته یئنه بوگونده بیر چوخ آشیق،  ائل آراسیندا یاشاماقدادیر، ائل آراسیندا حؤرمتی واردیر. مجلیسه گیره نده شرفینه هامی آیاغا قالخیر.آما بو گونکو آشیقلارلا کئچمیشده کی بیر چوخ اوستاد آشیقلاری توتوشدوراندا آرالاریندا بیر سیرا چئشیتلی فرقلر گؤزه د ه ییر.

بو حاقدا سونرالار دا دانیشماق اولار  نییه کی بو مسئله حاقدا دانیشماق آیریجا بیر مجال طلب ائده ر.

دئدیگیمیز کیمی آشیقلار اولدوقجا ائل آراسیندا ده رین بیر حؤرمته مالیک اولوبلار. بو حؤرمتین نه ده ن خالق آراسیندا اولماسیناچوخلو نه ده نلر سایماق اولار.

آشیقلیق صنعتی بیر خالقین وارلیغینی تک باشینا قورویوب ساخلایا بیلن تکجه صنعت دیر. آذربایجان خالقی نین مدنی وارلیغی، عنعنه سی بیر چوخ زامانلار دا و چئشیتلی دؤورلرده باسقی لارا معروض قالان بیر ادبییات اولدوغو اوچون اونو قورویوب ساخلاماقدا موسیقی،  اؤزه للیکله  آشیق صنعتینین بؤیوک رولو اولموشدور.

بو وظیفه نی بویونلاریندا داشییان آشیقلار عین حالداکی بو صنعت واسیطه سیله اؤزلرینین هابئله عائیله لرینین معاش لارینی قازانمیشلار ، ایکینجی مرحله ده آغاجدان یونولان بو موسیقی آلتی ایله بیر خالقی دا قورویوب ساخلامیشدیرلار.

بلکه ده بو سؤز اوزاقدان باخان کیمسه لره بیر آز گولمه لی گلدی، آما بوسؤز دانیلا بیلمه ین بیر حقیقت دیر.

بو گون آذربایجان خالقی اؤز وارلیغینین قورونماسی اوچون آشیقلیق صنعتینده چالیشانلارا بورجلودور. دوزدور کی آشیقلیق صنعتی ده همین خالقین مدنی وارلیغینین بیر بؤلومودور آما بو صنعت بیر بؤلومو اولدوغوندا باشقا بؤلوملرده ن داها آرتیق بو یولدا اؤنملی گؤرونور.

بو گون آذربایجان خالقی همین ساحه ده چالیشانلارا نه قده ر ده یر وئریرسه سانکی اؤز کئچمیشینه، اؤز وارلیغینا ده یر وئریر.

ائله همین اساسدا بو گون تبریزده یاشایان، آشیقلیق صنعتینده 30 ایلده ن آرتیق چالیشان، اوستاد آشیقلار سیراسیندا تانینان آشیق «عوض عباد پور» ون آد گونو مجلیسنده بیر یئره ییغیشیب اونو تبریک له ییریک.

آشیق عوضی «ساز، سؤز» مجلیسینده ن تانیمیشام.اونون ایفاچیلیق باجاریغینی کیمسه دانا بیلمز.لاپ بئله اؤزونده ن سووای باشقالارینی سئومه ییب اونلارا ده یر وئرمه ین، کیمسه لرده بو مسئله نی دانا بیلمزلر.

آشیق عوض بو گون یاشامینین 45 اینجی کوچه سینده آتدیملاماقدادیر. سازی باغزینا باسیب یارام یارام سؤیله مه ین آشیق عوض هله دئمه یه، چالماغا، سؤیله مه چوخلو سؤزو واردیر. اونو عزیزله مکده ن قیدیقلانان کیمسه لر خالقین وارلیغینا خور باخیرلار، نییه کی آشیقلاری قورویوب ساخلاماق اونلارا قول قاناد وئرمک بیر میلله تین معنوی وارلیغینا ده یر وئرمک دیر.

بئلنچی عزیزله مه لر سؤز یوخ کی بوتون آشیقلار اوچون کئچیریلمه لی دیر آما سیرا ایله اولورسادا بو گون سیرا آشیق عوض ده اولمالی دیر. بیزده بیر سئویلمز عادت ده واردیر، اودا بو کی دؤزوروک صنعتکارلاریمیز دونیالارین ده ییشسینلر، سونرا اونلارا باشیمیزا دؤیه ـ دؤیه عزیزله مه توتاق آما بو گون دیری لرده یاشامالی، عزیزلنمه لی دیرلر.

هامینین بو یاشاماقدا حاققی، پایی واردیر. بو گونده آشیق عوض اوندان پای آلمالی دیر. عؤمرونو گونونو بوتون دونیا مالیندان اَل چکیب یاشامینین گنج، دونیا مالینی دوشونمه لی چاغلارینی بو صنعت یولوندا ایتیره ن آشیق عوض کیمی لر،  بو گونده عزیزلنمه یه جک نه زامان عزیزله نه جک؟

من بوتون صنعت کار لاریمیزین اؤنونده باش اَییب اونلارین هامیسینا اؤز حؤرمت، سایقیمی بیلدیریره م . آرزی ائدیره م بوتون آشیقلار، بوتون اینجه صنعت خادیم لری یئری گلدیکجه واقتی ایله عزیزلنسینلر.

اونلارین عزیزلیگی بیزلرین عزیزلیگیمیزدیر.

آشیق «عوض عبادپور» ون سؤزلرینی بیرلیکده اوخویوروق

 

س ـ مومکون اولسا اؤزونوزو اوخوجولاریمیزا آرتیق تانیتدیراسیز؟

ج ـ بوتون گؤزه للیکلری یارادان گؤزه ل آللاهین آدی ایله. من قادیر اوغلو عوض عباد پور 1342 اینجی ایلده قاراداغین گؤزه ل گوشه لرینده ن اولان ورزیغانین یاخینلیغیندا یئرله شن حسنوو ماهالی نین «آرپالیق» کندینده آنادان اولموشام. ایللردیر کی سازلا مشغولام و آشیقلیق صنعتی ایله ماراقلانمیشام.

س ـ هانسی ایلده ن سازلا مشغول اولوبسوز؟

ج ـ 1357 اینجی ایلده ن سازلا مشغولام. دئمک اوتوز ایله یاخیندیر کی بو صنعتی سئچیب بو ساحه ده ایشله میشم.

س ـ آشیق صنعتی ایله نئجه تانیش اولدوز؟

دئدیگیم کیم 1357 اینجی ایلده ن بو صنعتله مشغولام.لاپ دوزو اوشاقلیق چاغلاریمدان سازلا ماراقلانمیشام. واقتی ایله آتام بالابان چالان اولوب. او زامانلار آشیقلارلا بیر یئرده اولاردیلار.اونلارین سازلاری چوخ زامانلار بیزده اولاردی. من بو سازلاری گؤتوروب چالاردیم. گؤره ردین سازی گؤتورموشم گئدیب تبریزده اولان ائویمیزین صاندیق خاناسیندا اوتوروب چالیرام. بیر زامان اؤزومه گلدیکده گؤره ردیم کی سحر آچیلیب خوروزلار بانلاییرلار.بیلردیم کی سحر اولوب هله من یاتمامیشام.

س ـ ساز سیزین اوچون نه دئمک دیر؟

ج ـ ساز منیم اوچون وارلیق دئمک دیر. ساز منیم اوچون حیات دئمک دیر. سازلا دانیشارام، سازلا دردله شه ره م، سازلا آغلایارام، اونونلا گوله ره م. بیر گون ساز چالماسام سانکی او گونو یاشامیم هئچدیر. سازدا ائله حئکمت لر واردیر کی آنجاق اونونلا یاشایانلار بیلر بو حئکمه تی.

س ـ سؤز نئجه سؤزله ده مشغول اولوبسوز هئچ؟

ج ـ دوشونجه نیز سؤز ده ن شعر دیرسه شعر یازمارام آما آشیق ادبییاتیندا یازیلان شعرلرله چوخلو ایلگیم واردیر. یاخشی شعرلری چوخ سئویب منیمسه یه ره م. بیر سیرا شعرلری ده مختلیف هاوالاردا

سازلا اوخویارام. منجه یاخشی شعیر اؤزونه اوخوجونون اوره یینده یئر آچا بیلر. سازین دا هابئله. یاخشی شعر سانکی سازلا برابر یاشاییر. سازلا برابر بویا باشا چاتیر، سازلا برابر منیمسه نیر و سازلا برابر یاشاییشدا اؤزونه یئر آچیر.

س ـ بورا قده ر هانسی موسیقی فستیواللاریندا ایشتیراکینیز اولوب؟

ج ـ بیر چوخ یئرلرده اولموشام او جومله ده ن:

1 ـ « جشنواره برائت از مشرکین » کی 1367 اینجی ایلده اوردان منه قیزیل میدال هابئله فخری دیپلوم وئریلدی.

2 ـ  68 اینجی ایلین فجر اون گونلویو« دهه فجر»  وئرلیشلرینده ن تقدیر لوح لاری هابئله قیزیل سیکه ده آلمیشام.

3 ـ 78 اینجی ایلده مقد س دفا ع هفته سینده کئچیریلن محلی موسیقی فئستیوالیندا آشیقلار قوروپونون باشچیسی اولموشام. و بیزیم قوروپوموز ایکینجی یئری قازانیب دیر.

4 ـ  81 ایلده تبریزده کئچیریلن آشیقلار جشنواره سینده اوچونجو یئری قازانمیشام .

5 ـ ژاپون، چین و آذربایجان اؤلکه لرینده کئچیریلن موسیقی فئستیواللانریندا حؤرمتلی آشیق حسن اسکنری  هابئله آشیق رسول قربانی، رحمتلیک آشیق حسین نامور، آشیق معصوم حیدریان لا بیرلیکده اولموشام. و...

و بیر چوخ باشقا یئرلرده کی ایندی هامیسی یادیمدا قالماییب.

س ـ سازی بیر جومله ده بیزه آچیقلایین؟

ج ـ منجه ساز ائله بیرزاد ده ییل کی بیر جومله ده اونو آچیقلاماق اولسون. آنجاق بئله دئییم کی سازاینسانلار یاشاییشینا  ایلاهی ده ن وئریلن ده یرلی بیر پای دیر کی منجه تایی هئچ بیر میللتده یوخدور.

س ـ سون سؤزونوز...؟

ج ـ سون سؤز اولاراق ایستردیم بیرینجی نؤوبه ده سیزین اؤزونوزده ن اؤز میننت دارلیغیمی بیلدیره م کی منه بو واقتی قویدونوز کی منده اوره ک سؤزلریمی دئییب سیزینله یولداشلاریملا دردله شم. ایکینجی ساز سؤز انجومنی نین شاعیر و یازیچیلاری هابئله قوروجو هیئتینده ن اؤز تشککورومو بیلدیریره م. بیرده منه یوخ بلکه سازا ، سؤزه دهیر وئره ن بوتون ده یرلی اینسانلاری باغریما باسیب هامیسینین اللرینی سیخیرام و اؤز میننت دارلیغیمی هامییا بیلدیریره م. ساغ اولون .

س ـ بیزده سیزه توتدوغونوز یولدا اوغورلار دیله ییریک.