پخله وئریم؟!
فرمان عمی روزنامه ایشینه باخیر...
رضا عالی
فرمان عمی دونن آخشام اوستو ایفطاردان سونرا منه زنگ آچیب: مهندیس اَلینده سو وارسا قوی یئره توکانا بیر باش چک دئیه هؤیله سک تیلفونو قاپادی.
بیلمه دیم ایفطاری نئجه بَله بؤیورد ائله ییب فرمان کیشی نین بویوروغو اساس دا توکانینا ساری یوللاندیم. فرمان عمی منی توکانیندا گؤردوکده: آی کیشی بس سن هارداسان آخی؟ نییه بس یازیق یوزوغا باش چکمیرسن دئیه منه گیلئیلندی.
اونون بئله گیلئیلیک لرینه عادت ائله میشدیم، سؤزونو یار ـ یاریمچیلیق قویوب: نه یووز؟نه اولوب منی بورا چاغیردین عمی؟ دئیه صندللرین بیرینین اوستونده اوتوردوم.
ـ ائوین تیکیلسین آداما بیرماجال وئریسن سؤزون دئسین؟ آفی ایلان کیمی تئز چالیسان آدامین آغزیندان.
ـ نئینک سن باغیشلا. دئمه دین آخی نه اولوب؟!
ـ هه دئییردیم. مهندیس نظریوا مندهن مشدی عیبادین فیلمینده دئمیشکن غزئته چی چیخار؟
فرمان عمی نین بو سؤزونده ن لاپ هویوخموشدوم: نه دئییم واللاه...
ـ نه دئییمی یوخدو کی کیشی. باشیندان ائله مه... یا چیخار یادا چیخماز...
منی یانسیلایا ـ یانسیلایا پخله قازانینین باشینا گئدیب سانکی منیم بو سؤزومده ن اینجیمیش کیمی ایدی... حیرص ایله بوشقابلاردان بیرینی دولدوروب، قاباغیمداکی میزین اوستونه قویدو.
ـ نه دئییم ده اولدو سؤز... منه باخ کی گؤر کیمینن مصلحت ائله ییرهم. سانکی عمی نین سؤزونون جاوابینی وئرمه لی ایمیشم.
پخله لرده ن بیرینی آغزیما قویوب: واللاه فرمان عمی نه دئییم آخی؟! دوزون ایسته سن منیم نظریمه چیخار...
فرمان عمی ائله بیل ائله بو سؤزو گؤزله ییردی. گؤزلری ایشیقلانیب الینده کی کفگیری قازانین دیبینده گزدیریب، باشقا بیر بوشقابی دولدوروب ایسته دی منیم قاباغیمداکی میزین اوستونه قویسون. منیم واریمدی سؤزونو ائشیتدیکده: آی سنی نه دئییم اولاسان، آدمی ائله کاریخدیریسان ها... دئیه بوشقابی گؤتوروب باشقا بیر میزین اوستونه قویدو.
فرمان کیشی سؤزلرینه بئله داوام وئردی: مهندیس بیلیسن، بیزیم بو شهرده هر کس آناسیندان کوسور صاباحیسی گلیر غزئته چی اولور. نه بیلیم فیس بوکا گئدیر یا نه بیلم بوینوندان گؤزلوک ساللاییر. اوندان سونرادا الینه بیر کاسا گؤتوروب دوشور دوکان بازارین جانینا. بو ایداره او ایداره. بو رئیسین بویون اوخشاییر او رئییسین بویون اوخشاییر. سن دئییرسن بس کی من بو ایشلرده ن گؤره ره م؟ یوخ کیشی. مهندیس، شیرین جانیوا آند اولسونها من هئچ زامان بو ایشلری گؤره سی ده ییلم. گؤرمه ره م ده. آخی بیلیسن ؟ منیم توکانیم گل گئت لی یئردی. سنه تای باشلی قولاقلی آداملار توکانا گلیر ـ گئدیر. بو سؤزو دئیه ـ دئیه دوداغی دا قاچدی.
فرمان عمی هیتلر کیمی بیر آدام اولدوغو اوچون چوخ دا سؤزلرینین قاباغیندا دایانماق اولمازدی، بیلیردی نئینیر. سؤزلریمیزه سون قویاق دئیه: فرمان عمی سن کی بو سؤزلری بیلرسن منی گئجه نین بو واقتی نه یه بورا چاغیریبسان؟! دئدیم.
فرمان کیشی: مهندیس داریخما هله سؤز چوخدو هارا گئده جکسن؟ سنی ده منه تای ایتیره ن تاپاندان چوخ سئوینر دئییب پییالاردان بیرینی پخله سویو ایله دولدوروب یئنه من اوتوران طرفه گلدی: مهندیس، مهندیس ، منه یول گؤسدهربا دوروب قاچماقدان ایش چیخماز، دئدی.
ـ عمی آیری سؤز نه دی؟ فرمان آیری سؤزو منه آچیقلاماق اوچون پخله قازانی نین باشینا گئدیب، الینی بئلینه ووروب: هه ... ه ..ه ایندی یئتیشدین اصلی مسئله یه...
سونرا الینی بئلینده ن چکیب: آما اصلی مسئله بیلرسن نه دیر؟ بودور کی ایندی من غزئته چی اولدوم هانسی سمته گئتمه لییم؟ ساغ طرفه؟ سول طرفه؟ هارا گئتمه ییم اؤزو مسئله دی... نه ده ن یازمالییام؟ ایسته سم بو جَرـ جوانین سؤزونه باخیب عشقی ـ مئشقی ده ن یازام اوندا پخمه لیک دی. در ثانی ایسته سم بو باره ده یازمایام اوندا دا بلکه منی حئسابا قویان اولمادی... بیلیرسن دونن فیس بوکا باخیردیم هامیسی بوتون سئوگی ده ن زاتدان یازیرلار. گؤرورسن گئدیر نم هاردان بیر دانا قیز اوغلان شکیلی تاپیر، اؤز عکسین ده قویور اونون یانینا گتیریر قویور صفحه سینه. ایندی ها دئگینن کی آی بالا بو عکس لر بیزیم نه دردیمیزه ده یه جک هامینین آجیغینا گله جک.
فرمان کیشی اینترنت ده ن دانیشاندا منیم الیم لاپ یاپیشدی اوزومه: آخی فرمان عمی سن بولاری هاردان اؤیره شیب سن؟!!
فرمان سانکی آجیغی گلمیشدی: مهندیس سن منی لاپ قویوبسان جیبیوه ها...کیشی منیم بو جرـ جوان دان نه ییم اَسگیک دیر؟ نییه هاردان اؤیره شمیشم؟نئجه یانی ؟دئییرسن بس کی فرمان ائله اؤلوب کی اینترنت ده ن ده باشی چیخمیر؟!!
ـ یوخ آخی ... دئییره م یانی؛ یادیما گلن بیر زامان سن اینترنته گئده نلرده ن آجیغین گلردی آخی؟ ایندی بئله بو ایش ...
ـ مهندیس ائله بیل دای یاواش ـ یاواش سفئهله دین ها دئیه سن یوخون گلیر . دئییرسن دور گئت یات صاباح گلرسن دانیشاریق...؟
ـ عمی آخی... آی فرمان عمی آخی نییه بس آجیغیوا گلیر؟
ـ عمی ـ مَمیسی یوخدو. یا دور گئت یات یادا قولاق آس گؤر نه دئییره م. گلیبسن بورا منیم پاسیمی آچاسان یا گلیبسن منه فیکیر یاردیمی ائده سن؟ سونرادا دئیینه ـ دئیینه: بیزه باخ گؤ کیمین قاپیسینا گئتمیشیک؟ دئدی.
ـ یاخشی دئ گؤره ک دای نه یین وار دئمه یه؟
فرمان کیشی ائله بیل سؤزونون اوجون آختاریردی بیر آز دینمه ییب سونراسی باشینی قاوزاییب: هه دئییردیم، من ایسته سم ایش صاحیبی اولام گره ک بیر آز بو رئیس مَییسلره زادا یاخینلاشام. هله دئیره م گئدیم بو خانه مطبوعات دی نه دی اورادا عضو اولوم. بیر کارت دان زاتدان دا آلیم دئیییره م. نه بیلیسن بلکه بیر گون گؤردون منده اوردا کاندیدا زاد اولدوم رای گتیردیم اولدوم اورانین رئیسی زادی. هه بابا منیم ایشیم خیاط لیق جان اولمایاجاق؟ بوتون خیاط دان زاتدان گئدیب اویان بویان دا رئیس اولوبلار. دئییرسن بس من باشارمارام؟ من اونلارین هامیسیندان چوخ بیلیره م. نییه من باشارمیرام گئده م کندلرین نوماینده لرین چاغیرام گتیره م کنفرانس مطبوعاتی قویام بئش اون تومن آلام یادا سؤز آلام کی منه ایداره لرین زادین بیرینده ایش وئرسینلر؟ هه بس خالق بئله لیگینن اؤزون چکیر یوخارییا. سنه باخما کی نئچه ایل دی ایشله ییرسن هئش زادین یوخدو!! نییه ؟ چون هوشون کسمیر بئله ایشلر ده ن گؤره سن...
فرمان عمی اوجون توتوب اوجوزلوغا گئدیردی.الینده کی کفگیری ائله گؤیده توولاییردی کی آز قالیردی سقف ده کی لامپی یئرینده ن قوپارتسین.
ـ یاخشی فرمان عمی منیم سؤزوم یوخدو. ایسته سن روزنامه چی اولاسان من نه دئییره م. آما یئنه ده دئییره م چتین ایش دیر.بیر آز گره ک گؤزله یه سن. ائله چوخدا باشی بوشونا ایش باشلاما. من گئدیره م قالانین دا صاباح گلره م دانیشاریق.
فرمان کیشی نین اوزونده راضی چیلیق گؤروردوم. دئیه سن من دئدیگیم سؤزلر اونون خوشونا گلمیشدی... گئجه یارییا یئتیشمیدی. ائوه ساری یوللاندیم. یولدا فرمان عمی نین غزئته چی اولماسینی دوشوننده اؤز ـ اؤزومه گولمه ییم گلیردی...
داينا