ورزیغانین ادبی اَنجومَنی قارا بولاق کندینده(1)

دئییره م گؤره سن یئر اوزونده بیزیم بو قاراداغ قده ر گؤزه ل بیر یئر ده واردیرهئچ؟البتته بیزه آذربایجانیمیزین هر گوشه سی گؤزه لدیر، آما قاراداغین باشقا یئری واردیر.

سون گونلرده آللاهدان بیر ایکی ساعاتلیق واقت اوغورلاییب، بیر آز گزیب دولاناق دئیه، ورزیغانلی یولداشلارلا بیرگه دوستوموز عادل عباسی گیلین کندی اولان «قارابولاق» دا اونلارا قوناق اولدوق. واللاه ائله بو زامانادا ایگیرمی ـ اوتوز آدامی  قوناق آپارماغا گره ک قورد اوره یی یئمیش اولاسان. آخی بو باهالیق ایلن بیر آز ائله چتین ایشدیرداینا قارداش...

نئچه واقت اولاردی کی طبیعته گئتمه میشدیک. آللاه سیزی ایناندیرسین، گول گولو دیندیریردی. یامان گؤزه ل یئریمیش بو قارابولاق کندی. ایندی بیلیره م کی بیزیم بو شاعیر «خوشنام» نه ده ن آللاها شوکور قوجالماق بیلمیر هئچ!

دئمه بس بو کیشی  کندین طبیعتینده ن بئله قایناقلانیرمیش. آللاها شوکور. پاخیلین گؤزو چیخسین.

 منده نئچه واقت اولاردی واقت ائله میردیم  کنده ـ زادا گئده م.  دای گزمه یین لاپ گؤزون چیخارتدیم.آمان آللاه هله یادیمدان چیخدی سیزه شاعیرلرده ن دئیم. مجنون قارداشی کی دئمه. کئفه لاپ گولله آتیردی. عزیزی ده کی اؤزون وئرمیشدی چادیرلارین کؤلگه سینه چایدان ایچیب پاپیریزدان چکیردی. هله من ائله او گونلرده بیلدیم کی اوستاد عزیزی نین قایناتاسی گیل همین کندلی دیرلر. واللاه ائله حاققی واریمیش ماشاللاه بئله جاوان قالسین. شاعیر خوشنام دا کی گؤزه ل شعرلر اوخودو. آللاه ائله اونو ائله آپاریجی یارالدیب.

 سس ـ سسه قاریشمیشدی. بولبول جه جه هی، ساز سسی، شاعیرلرین شعر اوخوما سسی، هامیسی بیر بیرینه قاریشیب چؤلو آلمیشدی آغزینا. یامان یئریز بوش ایدی. بو آرادا ناصر الماسی دوستوموزا اوره ییم یانیردی. دوسلار دئییردیلر نئچه گون قاباق تویو ایمیش. دوزدو آللاه موبارک ائله سین قوشا قاریسینلار. یا آتا بابالار دئمیشکن آللاه اولدوزلارین باریشدیرسین. آما یازیق قارداش؛ من، او گونو گؤردوم کی دوغورداندا سوبایلیق سولطانلیق ایمیش. نئینک هله آللاه کریم دی سنه ده بیر گون واقت چاتار بئله گزمک لره گئده رسن ایشاللاه.

قارداش دای بیلمیره م کی بو گزمه یین هاراسیندان دئییم هانسی گؤزه للیگینده سؤز آچیم. آنجاق کی منه چوخ یاپیشدی.

قارا بولاق کندینده(2)

آللاهدان گیزلی ده ییل سیزده ن ده گیزلی اولماسین، او گونو سیزین هامیزین یئریز بوش ایدی. آخی بیلیرسیز بیر طرفده ن هاوانین گؤزه للیگی، بیر طرفده ن ده یولداشلارین گؤزه للیگی قاریشیب بیری بیرینه کئفی سازلیغین دده سین یاندیرمیشدی.«ایستی کاباب ایستی فطیر...» اوخوماغین سیز ائشیتمیش اولسایدیزسا من او گونو گؤزومله اونو گؤردوم. خصوصیله بیر یئری وار، اوردا  دئییر کی: دویماق اولمور یئنه گتیر... یادیزدا وار؟هه اوراسی چوخ گؤزه ل اولورآما دوزون آختارساز عادیل قارداش اودون آز گتیرمیشدی. دای دئمک اولموردو کی دویماق اولمور یئنه گتیر. آنجاق یئریز بوش، چوخ کئفه باخدیق.

آما او گونوبیر مسئله ده وارایدی. بیزیم بو «کرویق» لی صمد قارداشیمیز بیزه چوخ دا قوشولمادی!! بلکه ده ورزیغان انجومنی نین  مودورو علیرضا  قارداشین دردینه دوشوب صمد قارداش دا. نئینک آللاه بوتون دردلی لرین دردینه درمان ائله سین. آمین

 

قارا بولاق کندینده(3)

گؤزونوز یامان گون گؤرمه سین قارا بولاق کندینده ن قاییتدیقدا منی گون ائله یاندیر میشدی کی چوخلاری دئییردی بس کی جهنم ده ن چیخمیشام. آما بورا اؤز آرامیزدی دوزون آختارساز بیر سیرا یئرلرده ـ ده بیله لر، بیلمه یه لر دئدیم گئتمیشدیم تورکییه نین آنتالیا سینا...!!

 کیم نه بیلیر هئچ اولماسا ائلنچی یئرلره گئده بیلمه سک ده پوزون  وئرمه یین خرجی یوخدو کی...

آما مزه لی یئر آروادین دانلاقلاری ایدی. آخی بیلیرسیز؟ بیلیره م کی بیلمیرسیز! .بیر نئچه گون سونراسی بیزیم بالدیز آغانین تویو ایدی. ایندی حئسابلا کی باجاناقلارین یانیندا (ماشاللا قیریلمیشلار آزدا ده ییل دیلر کی) جهنم ده ن گلن آدام نه جور مجلیسه چیخا بیلردی؟ هله ایندی چیخدین صاباحیسی آروادین جاوابین نه وئره جه ییدین.

آنجاق کی ساغ اولسون  «قارا بولاقلی»عادل عباسی نی . باعیث اولدو من او تویا گئتمه دیم نتیجه ده باجاناقلارین دا گول جاماللارین دا گؤرمه دیم هئچ، جیبیمده کی ده قالدی جیبیمده.

 

 

ساغ اولسونلار بیزی قوناق چاغیران دوسلار

( بورادا بو طنز مایاسیندا یازیلان بیر نئچه سطیرده ن سونرا یئری وار حؤرمتلی دوسلار او جومله ده ن ، جناب مهدی زارعی ورزیقانین ایرشاد مودورونده ن هابئله علیرضا نصیر زاده جنابلاریندان، عادل عباسی قارداشیمیزدان وبیر چوخ یولداشلاردان اؤز تشکورومو بیلدیریب اونلارا ساغ اول دئیم. اللریز قوللاریز آغریماسین دوسلار.)