داینا    

ســـــــن...

دومان اردم

سن،بیر گلایولون یوموقلوغونداکی قارانلیغین آچیلیشینا دوغرو

وئریلن،آلینان نفسین ایچینده کی تلاش،اضطرابین حرکتی

چیچک اورتاسی جیغیردان یاغمورلارا گولومسه نن پنجره...

من یوخولاریمین هرگئجه یوخودا گؤردویو رؤیالاریمین وئرگی فائیزینی،

اؤده میش آللاها...

دونَه نینده ن،بوگونونده ن،صاباحیندان قوپاریب عؤمرونه قاتمیش آللاهین

پیژامه لی بیر اوغلان اوشاغی...

آللاه عؤمرونون سونسوزلوغونو بیزلرینکینده ن اوغورلامیش.

کیم گؤرموش کیم اؤلموش اؤلومو بیر اوغلان اوشاغیندا سیچرایاندا؟

کوچه ده ن باشلانان اوغلان اوشاقلارییام،توپ اولور دیغیرلانیر تام سنین

اورتالیغیندا یوخ اولورام

ـ سن سویوق جینایه تین گیزله تدیگی چیخیلماز کوچه

گؤی اوزو اوچوشار کپنک قانادلاریندا

گؤی آلتی گؤزلویومده ن گلیر کئچر...

هرشئیین رنگی ماوی، ماوینین رنگی ماوی...

ماوینین رنگی سنین گؤزلرین...

سنله بابامام:دئوریم سونراسی دئوریلمیش گرئللانین کدری

اوغلومام سنینله کدرلرین اؤنجه سی...

اؤزومه گیردیکجه بیران، بو شهرین بوتون تئریالاریندا اؤزومو قویوب چیخیرام

ایچیمده ن بیر قار یاغماغا باشلادیم گؤیلره

قارین آلتیندان کئچریم آغاریر ساچلاریم،آغاریر قولتوغومدا مارکوزه

قارین اوزه رینده ن کئچریم قارالیر...

قار گؤنده ریلدیگی یئرلره گئری دؤنن کیتابسیز رسول

بیز:آخشام اوستو بو کافه لردهدن چیخالی

LEDحبلری ایدیک دیغیرلاندیق بیر نئچه

یوخ اولدوق قورساغینا دوغرو شهرین

بیز چوخ ایدیم یئرییردیک بیز یوخ ایدیک یئر ایدیک

بیرآزیمیز آزالیر بیرآزیمیز چوخدان چوخالدی گئتدی...

مئزوپوتامیالی بیر دوستاق دئدی تبریز زیندانیندا

:من سؤزو« میم» حرفینده ن باشلادی

مونجوقدان بالیق توخویوردو

تاریخ کیتابلارینین سامانلیغیندا

آنتروپولوقلارین بؤیوتوجوسو آلتدا

اورتادوغودا بیر سویقیریم دوسیاسی

کؤرفزه گمیلر گئده ر،نفت داملاسیندا اویموش اینسان قاچاغی بوشقالارا دولدورولموش...

بیر سندلی فیلمم!

گون اورتا اذانی سوتین بازارلاریندا...

بوتون کیبریتلری چاخیلماغا سنین بارماقلارینین سونراسی

یانقیندا توم دهشتین دامارلاریمدا توتوشماغا حاضیر بو آلکول

اؤزومو پورتاغال سویورام

دوننده ن فریزئرده دونوقموش رؤیالاریم کیمی

سنه بوتون دریلریمین آلتینداکی، بدنیمین اوغلونو، روحومون نوه سینی

قانلی نوه سینی وئریره م...آلسانا...

بو اللری بدنیمدن یونوب چیخاردیمسا اللرینی توتماق اوچون

اوزومو ژیلئتله یاردیمسا سنی دینله مک اوچون

آنارشی سیراسیندا یارالانمیش بیر اوره ک داشییان

بیر آمبولانسام!

سن گئجه یاریسی آچیق بیر اورژانس

آچیل بیاضلیغین سونسوز قاپیلارینی

گئجه:دونیادان بوتون گئده ن گلنلرین

اوتوبان اورتاسیندا بیر گؤز یاشی سیچرامیش چاشمیش قالمیش

وئریلن سؤنولن چیراقلارین، باسیلان سیگناللار اؤلوم پیئسینین سونونجو

پرده سینده یونونجو قاتیل...

گؤزلرینده ن قار یاغماغا باشلار جسدیمه

گؤزه ل لیگینین اوجویلا توخونورسان،شفقه تینین اوجویلا...

بو تن جوغرافییاسینین ان اؤرپک کندلرینه...

اؤلوم:بیر قاتاردیر سس سیزلیکده ن و سنسیزلیکده ن اولوشموش

آلیر گؤتورور سؤزجوکلری،ایضطیرابلاری آلیر گؤتورور نه وارسا کیم وارسا...

سن آغاردیر باسدیریرسان بوتون مزارلاردا

بؤیودورسن پیژامه لی بیر اوغلان اوشاغی

دوغارسان یئنیده ن بیر گلایولون اورتا بایاضلیغیندان