ماللا پالتاري تيکمکده تبريزين  اَن قديم اوستادلاريندان اولان

سید جواد اکبرپوران خیاطی ايلن گؤروش 

 دانشیق آپارانلار: رضا عالی، یوسف انصاری و بابک مینقی   

یایین جيزلاما گونلرینين بیرينده یوسف انصاری ، بابک مينقي ، بيرده من حاج احمد اکبرپوران جناب لارينین توکانینا قوناق اولدوق.(قئد ائتمه لييم کي بو زحمت کئش اوستاد، ايندي داها آللاهين رحمتينه گئد يب) البتته بير چوخ زامان بوندان اؤنجه من بو کيشيني تانييارديم. هئي اؤز-اؤزومه دئيرديم کي کاش بير گون ايمکان اولا، گئديب بو کيشي ايله بيرگؤروشوب اونونلا دانيشيق آپارام.آنجاق بو ايشه ايمکان ياراندي، گئديب بو ايشي دوسلارلا بير ليکده گؤردوک.  و اونون ایشينين حاققينداا دانيشيق آپارديق. حاج احمد اکبرپوران جنابلاری اوزون ايللر اولار کي  آتا سیندان قالان «روحانیت ه پالتار تیکمک» صنعتی ايلن مشغول دور. اونون شیرین و گؤزه ل صؤحبت لرین بیرلیکده اوخویاق. قئيد ائده ک کي بوردا «ماللا» کلمه سي اونون عمومي آديندا ايشله نيب.

رضا عالي

آدیم سید جواد، اکبر پوران خیاطی سیجیللیم دی. تبریزين دوه چی محلله سینده آنادان اولموشام. دده مین آدی سید نقی ايدی. ایشیم روحانیت پالتاري تیک مکدی. دونیا دا منیم عبامی هئچ کیم تیکه بیلمز – قوم  دا عبانی تیکيب  کورلايارلار گتیره رلر من اونو دوزه لده ره م.

◄ بورا قده رکیملره پالتار تیکمیسن!؟

ـ بؤیوک کیچیک هامیيا پالتار تیکمیشم.  رحمت لیک آقای شهیدی و اونون يئزنه سينه، حجت آغایا، آقای شریعتمداری يه، رحمت لیک آقای قاضی و اونون اوغلونا، آقای مدنی يه ده من ماللا پالتاري تیکمیشم، آقای مجتهد شبستری و اونون آتاسینا دا من، عبا تیکمیشم.

◄ نئچه ایل بوندان قاباق بو ایشی باشلاييبسیز!؟

ـ منیم دده م ده خیاط ايدی. دده مین دده سی ده او زامانکی چرخ (چرخ خیاطی) یوخودو، و منیم بؤیوک دده مین قاپیسینا فایتون ايلن گلردیلر پالتار تیک مک اوچون.

◄ اولارادا عبا قبا تیکردیلر!؟

 یوخ. اونلار قدیم چوخ دوزگون دونلار تیکردیلر. قدیم بیر پالتارلار واریدی کی سنله من گؤرمه میشيک.

◄ آیری شهرلردن ده سیز پالتار سیفاریش وئره رلر!؟ 

بوتون شهرلرده ن، باکی دان تورکیيه ده ن ایتالیادان. اوگون تورکیيه ده ن گلمیشدیلر اوچ دانا عبا آپاردیلار.

◄ تيکيلن بیر پالتار نئچه مئتير پارچا آپارار؟

 اوچ مئتير، ایکی مئتير. قالیب آدامین یوغون ـ آریقلیغينا.

◄ عبانین جينسی نه ده ن اولار!؟

 موختلیف مودئللری وار. پشم ده ن، يون دان  دا اولار. تئتروندان دا اولار. قیش دا ماهوت دان تیکه ره م.

◄ ماللا پالتاری نئچه تیکه ده ن اولار!؟

 اوچ تیکه.

 دون، عبا، ميصری.

◄ بیر ماللا ایل ده بونلاردان نئچه دانا سيني تیکدیره ر!؟

 معلوم اولماز قالیب دؤولتلی، کاسیب اولماغینا.

◄ مگر روحانی لرین ده دؤولتلی کاسیبی وار!؟

  نیيه یوخ دو. ائله سی وارکي عبا کؤهنلدیکده ن سونرا آتار گده ر. ائله سی ده وار کي عبانی ییرتیلانا قده ر ساخلار.

◄ قدیم نئجه !؟

ـ قدیم ایشلر بئله ده ييلدي. ایندی جماعتین ذهنی دورو دور. کئفی سازدیر. قدیم ایشلر بئله ده ییلدی. ایندی هامینین ماشيني وار اونا گؤره ده من توکانیمی بازاردان ییغشدیردیم. خیاوان آغزیندا توکان آچديم.

◄ قدیم ایلن ایندینین نه فرقلری وار!؟

ـ قدیم ماللالار بیر سیستئم ایدی. ایندینین روحانیلری ده بیر باشقا سیستئم. قدیم ايلن ایندینی قاتماق اولماز.

 قدیم پالتارلاری بوجور شیک گئییننمزدیلر. ایندی ميللت  سلیقه لی دیرلر. قدیم ایلده ن ایله، بایرام دان بیر، ايل ده ييشنده پالتارا باخاردیلار.

◄ روحانیت پالتارینین هانکیسیندا جیب اولار؟

 ـ دوندا.

◄ جیبلرین نه اندازه دوزلده رسن!؟ (چوخ گولنده ن سونرا) قالیب روحانینین یئکه کیچیک لیگينه. (يئنه گولور) هر ده ن اونلاردا بير سيراسي منه شوخلوق اوچون دئیرلر، سن بونلارین جیبلرین يئکه ائله يیبسن نه قده ر اَل آتيريق ته کينه چاتمير.

◄ اؤزلری ده ایسته يرلر کی جیبلرین  یئکه تیکه سن!؟

ـ یئکه دئین ده اولار، کیچیک ايسته ين ده اولار.

◄بورا قده رتيکديگين لاپ بؤیوک جیبی  یادیوا گلیر!؟ (یئنی ده ن گولور، اما سوالیميزا جاواب وئرمیر)...

◄ بیر پالتارین تیکمه سینی نئجه باشلارسيز!؟

 ـ اوو ه ل گره ک گله لر بورا، من بیله لرین گؤره م. دئیم نه قده ر پارچا آلمالي ديرلار. او ندان سونرا کی پارچانی گتيردی اندازه توتارام سورا دئیه ره م گلسینلر پيروب ائله يم.

 ◄ منه عبا تیک سن نئچه مئتير پارچا آپارار!؟

ـ سنه ایکی مئتير بیر چره ک. دوستووا دا ایکی مئتير یاریم، اوسنده ن اوجا دی آرتيق پارچا آپارار. من باخماق ايلن بیله ره م کی کیمه نه قده ر پارچا لازیم دیر.

◄ عمامیيه نئچه مئتير پارچا ایشله نر!؟

ـ آلتی مئتير. وال هندی یا حاج رحیم پارچاسی.

◄ هئچ اولوب  بیرينه پالتار تیکه سن  اودا سنه بوشلو قالا!؟  

ـ بوشلودا قالار لار، ائله لری وار کي یادلاریندان دا چیخار . قالیب دینینه.

◄ آیا حجت الاسلام ايلن آیت اللاه ین پالتارینین فرقی وار!؟

 ـ یوخ، فرق تکجه اونلارین هئیکللرینده دیر.

◄ اَن باهالی پارچا و اونون تیکمه سینین زحمت ياناسي نئچه اولار!؟

ـ او قالیب پارچاسینا. پارچاسین اؤزو آلار. زحمت ياناسي دا قالیب آدامینا. پالتارین ایشینه، هر کسین بیر قیمتی وار.

◄ آقاي مجتهد شبستری ده ن نئچه آليبسان!؟

 ـ بویاخینليقلاردا گلمیشدی آتميش مین ایسته دیم چیخارتدی آتمش بئش مین وئردی.

◄ چوخ ساغ اول کی واقتيزی بیزه وئرديز، آخیر دا بیر سؤزونوز وارسا بويورون!؟  

ـ ائله ماللالار وار کی بیز اونلارا نسل اندر نسل پالتار تیکمیشيک. دده لرینه اؤز لرینه و اؤولاد لارینا. دده م ده اونلارین دده لرینه پالتار تیکیب. اينشاللاه کی     بیزده ن راضی اولالار و بیزی حلال ائله يه لر.

بو دانيشيقدان بير نئچه آي سونرا ائشيتديگيميزه گؤره اوستاد آللاهين رحمتينه گئديب. روحو شاد اولسون.